„ვივამედის“ განცხადებით, მიხეილ სააკაშვილი „აქტიურ სამედიცინო ჩარევას“ არ საჭიროებს

„ვივამედის“ განცხადებით, მიხეილ სააკაშვილის ჯანმრთელობის მდგომარეობა პაციენტის სტაციონარში ყოფნის პერიოდში არ გაუარესებულა.

„ლაბორატორიული მონაცემები დინამიკაში სტაბილურია, ნაწილი ინსტრუმენტული გამოკვლევების შედეგები – უარყოფითი დინამიკის გარეშეა.

მაგნიტურ-რეზონანსული ტომოგრაფიაზე ნანახი ცვლილებები – ხანდაზმულია, არ არის კავშირში პაციენტის ამჟამინდელ მდგომარეობასთან და არ საჭიროებს აქტიურ სამედიცინო ჩარევას, რეკომენდირებულია დინამიკაში დაკვირვება“, – ნათქვამია კლინიკის განცხადებაში.

„ვივამედი“ აღნიშნავს, რომ პაციენტის ჯანმრთელობის შესახებ ცრუ ინფორმაციის გავრცელება მიუღებელია.

„მასმედიით ხშირად გაჟღერებული ინფორმაცია, რომ კლინიკა „ვივამედს“ არ შესწევს უნარი დასვას დიაგნოზი და მართოს პაციენტი სათანადოდ – არის აბსურდული და შეურაცხმყოფელი. ყოვლად მიუღებელია კლინიკაზე და კლინიკის ექიმებზე ზეწოლა, მათ კომპეტენციებში ეჭვის შეტანა და პაციენტის ჯანმრთელობასთან დაკავშირებული ცრუ ინფორმაციების გავრცელება. გულდასაწყვეტია და კითხვის ნიშნებს ბადებს ცალკეული ექიმების მხრიდან რეალობას მოწყვეტილი ისტერიული ინფორმაციის ტირაჟირება, რომ პაციენტი არ არის კონტაქტური, ვერ გადაადგილდება, მდგომარება არის კრიტიკული და ა.შ.“, – აცხადებენ სამედიცინო დაწესებულებაში.

მიხეილ სააკაშვილი რუსთავის N12 პენიტენციური დაწესებულებიდან „ვივამედში“ 12 მაისს გადაიყვანეს. როგორც კლინიკაში აცხადებენ, საკვების არასრულფასოვანი მიღების შედეგად შესაძლო გართულებების თავიდან აცილების მიზნით, პაციენტს უგრძელდება ლაბორატორიული მონიტორინგი, კონსულტირებულია სხვადასხვა პროფილის ექიმ-სპეციალისტის მიერ და ჩატარებული აქვს მრავალი ინსტრუმენტული კვლევა, მათ შორის, მაგნიურ-რეზონანსული ტომოგრაფია.

მიხეილ სააკაშვილის განცხადებით, ზურგის არესა და ქვედა კიდურებში ძლიერი ტკივილები აწუხებს, რის გამოც დღეში რამდენჯერმე ტკივილგამაყუჩებელ ნემსს უკეთებენ. მისივე თქმით, სულ უფრო უჭირს გადაადგილება და ძირითადად წევს. ყოფილი პრეზიდენტი მიიჩნევს, რომ „ვივამედში“ მისი მდგომარეობა ვერ გაუმჯობესდება.

ბმული